Rritja e çmimeve të karburanteve vijon të mbetet një barrë e rëndë për familjet shqiptare, duke zënë një pjesë të konsiderueshme të buxhetit të tyre mujor.
Eksperti i ekonomisë, Fotos Çoçoli, i ftuar në studion e QUO VADIS në vizion Plus ka ngritur shqetësimin se Shqipëria renditet ndër vendet me peshën më të lartë të shpenzimeve për karburant në raport me të ardhurat familjare.
Sipas tij, një familje mesatare shqiptare shpenzon rreth 7% të të ardhurave për karburant, një nivel shumë më i lartë krahasuar me vendet e rajonit dhe ato evropiane.
Ai bëri edhe një krahasim me vendet fqinje, duke theksuar se diferenca është e ndjeshme. Sipas tij, në Greqi një familje mesatare shpenzon rreth 2.5% të të ardhurave për karburant, çka do të thotë se për qytetarët grekë kjo kosto është rreth tre herë më e ulët.
“Ne duhet të bëjmë shumë kujdes, sepse pjesa e shpenzimeve për karburant mesatarisht për një familje tonë, qoftë si shpenzim ditor, javor apo mujor, është më e larta në rajon dhe ndër më të lartat në Evropë. Pra, kjo pjesë zë 7% të shpenzimeve familjare. Tek të ardhurat e çdo familjeje mesatare, pjesa që shkon për të blerë karburant tek ne është mesatarisht 7%, ndërkohë që te fqinji ynë, familja greke, kjo shifër është 2.5%. Pra, për ata është tri herë më e lirë”, tha Fotos Çoçoli, ekspert ekonomie.
/vizionplus.tv
