Shoqata e Mikrofinancës Shqiptare është kundër ndryshimeve të propozuara nga Banka e Shqipërisë për të vendosur kufi për normat e interesit dhe penalitetet në rast mos pagese të kredisë. Brunilda Isaj, Sekretare e Përgjithshme e Shoqatës e ftuar në emisionin E-ZONE në Vizion Plus e konsideron këtë si një ndërhyrje në tregun e lirë duke diktuar çmimin.
“Ne jemi kundër praktikave të tilla për të diktuar çmimet në treg. Është konkurrenca ajo që duhet të përcaktojë çmimet dhe jo institucionet. Ky është një rast që rrezikon të kthehet në precedent edhe në produkte të tjera në të ardhmen”, sqaroi Isaj.
Sipas Shoqatës, masa të tilla do të ndikojnë në uljen e përfshirjes financiare të popullatës.
“Shumë kompani që operojën në këtë fushë nuk do të mund të mbijetonin me këto masa, ndaj disa prej tyre do të mbyllen. Për rrjedhojë, mijëra qytetarë nuk do të mund të marrin dot kredi në shuma të vogla.”
Mikrofinanca numëron rreth 177 mijë klientë, të cilit nuk kanë akses në banka ndaj i drejtohen kompanive të tilla për të marrë kredi në shuma të vogla. Bëhet fjalë për qytetarë që nuk kanë një llogari bakare dhe kanë kulturë të ulët financiare.
