Presidenti i Shteteve të Bashkuara të Amerikës, Donald Trump, ka kritikuar FBI-në për vrasjen tragjike të 17 personave në një shkollë të mesme në Florida pak ditë më parë.
Me anë të një postimi në Twitter, Trump tha se FBI ka pasur informacione mbi të riun vrasës, Nikolas Kruz, por nuk arriti të veprojë në kohën e duhur, duke shtuar se kjo agjenci ka shpenzuar shumë kohë për hetimin e Rusisë, në vend që të parandalonte të shtënat në shkollë.
“Shumë e trishtueshme që FBI humbi plot sinjale të dërguara nga autori I ngjarjes në shkollën e mesme të Floridas. Kjo është e papranueshme. Ata po shpenzojnë shumë kohë duke u përpjekur të provojnë marrëveshjen ruse me fushatën Trump – nuk ka bashkëpunim. Kthejuni punës dhe na bëni të gjithëve të ndihemi krenarë”.
Vërejtjet e Trump erdhën pasi FBI tha se kishte informacione se 19-vjeçari Nikolas Cruz, kishte një “dëshirë për të vrarë”, por agjentët e FBI-së nuk arritën të vepronin në lidhje me informacionin.
Trump gjithashtu kritikoi demokratët për dështimin e tyre për të kaluar legjislacionin e kontrollit të armëve.
“Pse demokratët nuk miratuan legjislacionin e kontrollit të armëve kur ata kishin Senatin dhe Shtëpinë e Bardhë gjatë administratës së Obamës. Sepse ata nuk donin, dhe tani vetëm flasin!”
Një ditë më parë, mijëra studentë, prindër dhe mësues, bën thirrje për rishikimin e ligjeve mbi armët. Thirrjet e tyre vijnë pak ditë pasi një 19 vjeçar, vrau me armë zjarri 17 persona në një shkollë të mesme në Florida, mes tyre nxënës dhe mësues.
