Në muajin qershor, Institutit i Statistikave thotë se numri i vizitorëve dhe i netëqëndrimeve në strukturat akomoduese pësoi një rritje të ndjeshme krahasuar me një vit më parë.
Vizitorët e huaj që u akomoduan në struktrurat pritëse në Shqipëri u rritën me 37%, referuar shifrave, dhe ata, sipas INSTAT, erdhën më së shumti nga Kosova, Italia dhe Polonia.
“Nëse shtohen njësi akomoduese të reja, nga një muaj apo një vit më parë, atëherë në llogari na dalin numra më të mëdhenj që jo domosdoshmërisht kanë ardhur nga fluksi rritës, por është rritur thjesht kapaciteti akomodues në Shqipëri. Pra, jo domoshmërisht mund të kemi rritje të shfrytëzimit të kapacitetit të hoteleve me rritje të qëndrimeve në hotele të regjistruara”, tha Luan Dervishi, ekspert i Tregut Turistik.
Turizmi, sipas operatorëve, këtë vit e vijoi rritjen, por me një ritëm më të ngadaltë se një vit më parë.
“Tregu i shqiptarëve nga rajoni, kryesisht Kosova, Maqesdonia dhe Mali i Zi, ata që quhen me pasaportë greke, por janë shqiptarë, janë tregu kryesor i fluksit. Tregu i Kosovës ka një ulje në raport me vitin e mëparshëm. Italia dhe Spanja që kanë qenë tregje optimiste në 2 vitet e fundit kanë një ulje apo stopim, ndërsa Franca dhe Gjermania kanë pasur një trend rritjeje me 20%. Tregjet që mund të jenë me numra të vegjël, por që janë me gjeografi të madhe ndërkombëtare kanë pasur një rritje të madhe. Tregjet nga kontinetet Azia, Afrika, Amerika, kanë pasur rritje, edhe pse janë numra shumë të vegjël në raport me totalin”, u shpreh eksperti.
Rritja më e madhe e vizitorëve të huaj në qershor, sipas INSTAT, u shënua në zonat bregdetare, ndërsa një dyndje më të madhe ka pasur edhe për kampingjet apo rulotët e argëtimit, ku qëndrimet janë dyfishuar në raport me qershorin e vitit të kaluar.
/vizionplus.tv
