Ka përfunduar takimi i drejtorit të përgjithshëm të Policisë së Shtetit, Skënder Hita, në Drejtorinë Vendore të Policisë Korçë.
Gjatë mëngjesit të sotëm, Hitaj ka zhvilluar një takim me drejtuesit e komisariateve të juglindjes.
Burime nga mbledhja bëjnë me dije se, në vijim të ndryshimeve në drejtoritë e qarqeve, ai ka konfirmuar në detyrë Vilson Balën si drejtor të Drejtorisë Vendore të Policisë Korçë.
Të njëjtat burime bëjnë të ditur se drejtori i përgjithshëm i Policisë së Shtetit ka dhënë dy porosi kryesore për strukturat policore.
E para lidhet me rritjen e vëmendjes dhe intensifikimin e punës për parandalimin dhe goditjen e shpërndarjes së lëndëve narkotike, veçanërisht në zonat pranë shkollave.
Sipas tij, qarku i Korçës e mbart këtë problem dhe kërkohet një angazhim më i madh për zgjidhjen e tij.
Një tjetër porosi ka qenë për Policinë Rrugore, ku është kërkuar që në akset nacionale të shmangen postblloqet, sidomos gjatë sezonit veror, ndërsa kontrollet të kryhen përmes përdorimit të makinave inteligjente dhe radarëve.
Në përfundim të takimit, Hita nuk ka pranuar të prononcohet për mediat.
