Ministri Malaj: 205 mld lekë të ardhura në 3 muajt e parë të vitit, monitorojmë çmimet e naftës

Ministri i Financave, Petrit Malaj, ka paraqitur bilancin e tre muajve të parë të vitit, duke deklaruar se të ardhurat janë 110 milionë euro më të larta se plani i parashikuar. Sipas tij, kjo rritje nuk lidhet me rritje të taksave apo tatimeve, por me përmirësim të administrimit tatimor dhe doganor.

“Në këto 3 muaj, janë plot 205.1 miliard lekë të ardhura. Krahasuar me të njëjtën periudhë të vitit të shkuar, 13.3% më shumë. Kemi 110 milion euro më shumë të ardhura se sa kishim planifikuar. Rritja nuk ka ardhur si rezultat i rritjes së taksave apo tatimeve, por një mirëadministrimi tatimor dhe doganor”, deklaroi ministri Malaj.

Ai shtoi se rritja ekonomike është ndikuar nga disa faktorë, përfshirë formalizimin e ekonomisë, konsumin e brendshëm dhe performancën e sektorit të shërbimeve dhe tregtisë.

“Janë disa faktorë që kanë ndikuar në rritjen ekonomike, formalizimi i ekonomisë, ka një xhiro të deklaruar më të drejtë, konsumi i brendshëm që mbetet i fortë, performancë të mirë të sektorit të shërbimit dhe tregtisë”, u shpreh Malaj.

I pyetur për rritjen e çmimeve të karburanteve, ministri tha se qeveria po e monitoron situatën në mënyrë të vazhdueshme dhe po ndjek rekomandimet e institucioneve ndërkombëtare për mbrojtjen e grupeve vulnerabël.

“Jemi duke monitoruar në mënyrë të vazhdueshme situatën… me rekomandimet e Bankës Botërore dhe Fondit Monetar Ndërkombëtar që sugjerojnë që qeveria duhet të fokusohet te grupet vulnerabël sa herë marrim masa apo ndërhyjmë në treg”, deklaroi Malaj.