“Shteti i ka duart me gjak”/ Nis protesta në Prishtinë për vrasjen e Arlinda Zekajt

Në sheshin “Zahir Pajaziti” në Prishtinë është mbajtur një protestë për të kërkuar drejtësi për vrasjen e Arlinda Zekajt dhe përgjegjësi nga institucionet. Në tubim morën pjesë edhe familjarët e saj.

Gjatë protestës, qytetarët brohoritën thirrje si “Na nuk jemi vetë, e kena njana-tjetrën”, “Liri, barazi, solidaritet” dhe “Shteti i ka duart me gjak”. Mes pankartave të mbajtura nga protestuesit ishte edhe mesazhi: “Gjumi s’ka me iu marrë, flaka ka me iu dalë”.

Arlinda Zekaj u vra të dielën në mbrëmje në Vitomiricë të Pejës. Për ngjarjen është arrestuar kunati i saj, i dyshuar për vrasjen, ndërsa më herët është vënë në pranga edhe ish-bashkëshorti i viktimës.