Mesdita e kësaj të enjteje shënon afatin e fundit për depozitimin e dokumentave për ata që duan të bëhen pjesë e garës për kryetarin e Partisë Demokratike.
Vizion Plus mëson se ish-deputeti Ervin Salianji, i cili ndodhet në Londër ka dërguar dy bashkëpunëtorë për të dorëzuar dokumentacionin e kandidimit, por ata nuk kanë mundur ta depozitojnë atë për shkak të mungesës së përfaqësuesve të sekretariatit në seli, duke lënë materialet në recepsion dhe duke njoftuar se do t’i dërgojnë edhe në mënyrë elektronike.
Ndërkohë, në seli ka mbërritur edhe një përfaqësues i juristes Alesia Balliu për të dorëzuar kërkesën për kandidim, por për shkak të mungesës së sekretariatit, dokumentet janë dorëzuar me të njëjtën procedurë.
Gjithashtu në garë ka vendosur të hyjë edhe mjekja nga Fushë-Kruja, Mereme, e cila ka dorëzuar dokumentat pranë recepsionit të PD.
Ndërkohë, ish-kryeministri Sali Berisha mbetet një nga figurat kryesore në këtë proces, ndërsa më herët aktivistja shqiptaro-amerikane Evi Kokalari ka deklaruar se nuk i është lejuar të dorëzojë kandidaturën e saj, pretendim i bërë publik përmes rrjeteve sociale. Procesi i verifikimit të kandidaturave pritet të përfundojë së shpejti, ndërsa zgjedhjet për kreun e PD-së janë caktuar të mbahen më 23 maj.
