Një spektakël i papritur natyror është regjistruar në ujërat e zonës Karaburun–Sazan, pranë Vlorës, ku një grup turistësh që po eksploronin me gomone bukuritë e zonës janë surprizuar nga shfaqja e një tufe delfinësh.
Turistët, të cilët po lundronin përgjatë kësaj hapësire detare Karaburun-Sazan, kanë përjetuar momente të veçanta kur delfinët janë afruar pranë gomones së tyre, duke i shoqëruar për disa minuta dhe duke krijuar një “show” natyror që ka mahnitur të pranishmit.
Sipas guidave turistike që operojnë në këtë zonë të Vlorë, raste të tilla janë të shpeshta, por çdo herë mbeten një surprizë e këndshme si për vizitorët ashtu edhe për drejtuesit e gomoneve. Ata theksojnë se prania e delfinëve e bën eksperiencën turistike edhe më të veçantë dhe të paharrueshme.
Turistët kanë dokumentuar momentet me foto dhe video, duke i konsideruar si një nga kujtimet më të bukura të vizitës së tyre në këtë zonë turistike të jugut të Shqipërisë.
/vizionplus.tv
