Ky është momenti kur Albiano Kreçi humb kontrollin e mjetit lundrues dhe përplaset me skafin e Policisë Kufitare në Ksamil, aksident që i kushtoi jetën.
Në pamjet e siguruara nga Vizion Plus shihet mjeti i të riut me shpejtësi të lartë duke u përplasur me skafin e Policisë Kufitare.
Përplasja ka qenë e fortë dhe si pasojë 20-vjeçari humbi jetën. Menjëherë pas ngjarjes, efektivët e policisë dhe persona të tjerë që ndodheshin në zonë kanë ndërhyrë për ta nxjerrë të riun nga deti dhe për t’i dhënë ndihmën e parë. Ai u transportua me urgjencë drejt Spitalit të Sarandës, por nuk arriti t’u mbijetojë plagëve të marra.
View this post on Instagram
Sipas të dhënave paraprake, aksidenti ndodhi rreth orës 18:30, rreth 400 metra larg bregut të Ksamilit. Policia bëri me dije se i riu po drejtonte një mjet lundrues tip “jet ski” (makinë lundruese), kur dyshohet se u përplas me skafin e Policisë Kufitare, i cili ishte i stacionuar në det gjatë kryerjes së detyrës.
Ndërkohë, Prokuroria, në bashkëpunim me Policinë e Shtetit dhe Agjencinë e Mbikëqyrjes Policore, ka nisur hetimet për të zbardhur dinamikën e plotë të aksidentit dhe për të përcaktuar përgjegjësitë lidhur me ngjarjen e rëndë.
