Komisioneri për zgjerimin Oliver Varhelyi prezantoi në Komitetin e Jashtëm gjetjet e progres-raportit për Shqipërinë, duke vlerësuar progresin e bërë në reformat kyçe. Ky moment e çon një hap më pranë zhvillimin e Konferencës së parë Ndërqeveritare.
Më pas zyrtari i lartë i BE, në një konferencë për mediat, u ndal edhe tek miratimi i Kodit të ri Zgjedhor dhe çështja e koalicioneve.
Një ditë përpara vizitës në Tiranë, Komisioneri kërkoi që palët të angazhohen së bashku në reformat integruese.
OLIVER VARHELYI
KOMISIONER I BE PER ZGJERIMIN
“Ajo që mund të them është se në 5 qershor u arrit një marrëveshje shumë e mirë e cila u mbështet edhe nga OSBE-ODIHR. Prioriteti im është që të gjitha palët të bien dakord për reformën elektorale. Nëse ligji i ndalon koalicionet të formohen pas zgjedhjeve edhe pse forcat mund të kenë garuar të ndara, ose nëse kjo çështje mund të sjellë problem, mendoj se kjo çështje duhet diskutuar. Dua të angazhohem personalisht në këtë çështje sepse do të ishte humbje e madhe që kjo të bëhej pengesë përpara konferencës së parë ndërqeveritare. ”
Varhelyi nënvizoi se një Gjykatë Kushtetuese ende jo funksionale, është gjithashtu një pikë problematike dhe një kusht që duhet përmbushur sa më parë.
“Me katër anëtarët aktualë, Gjykata ka kuorumin minimal për të gjykuar mbi pranueshmërinë e çështjeve. Procesi i përzgjedhjes për tre poste të lira është duke vazhduar. Procesi është prekur edhe nga kriza COVID-19, por pritet të finalizohet si përparësi. Përfundimi i emërimeve në Gjykatën Kushtetuese do të vazhdojë pasi Gjykata e Lartë të arrijë kuorumin e kërkuar prej tre të pestave të anëtarëve në detyrë, pasi kjo e fundit është autoriteti i tretë emërues së bashku me Asamblenë dhe Presidentin e Republikës. Kemi nevojë për një Gjykatë Kushtetuese funksionale, prandaj inkurajojmë palët që të vazhdojnë në këtë drejtim.”
Komisioneri Varhelyi u shpreh optimist se këshilli europian do të arrijë një marrëveshje për kuadrin negociues dhe konferenca e parë ndërqeveritare mund të mbahet brenda presidencës gjermane.
