15 investime madhore me vlerë 1,5 miliardë lekë janë realizuar nga Bashkia e Maliqit gjatë vitit që lamë pas, ndërkohë që të tjera investime janë kryer nëpërmjet kursimit të 65 milionë lekëve nga procedurat e prokurimeve publike.
90 investime të tjera janë realizuar nga Drejtoria e Punëve Publike në të gjithë territorin e bashkisë. Shifrat janë bërë të ditura nga kryebashkiaku Gëzim Topçiu gjatë analizës vjetore për vitin 2019.
Nga ana tjetër kryebashkiaku i Maliqit ka kërkuar një punë më të mirë nga Drejtoria e të Ardhurave pasi realizimi i të ardhurave nga taksat dhe tarifat vendore në këtë bashki për vitin 2019, nuk e kalon masën 50%.
Topçiu ka kërkuar rritjen e kërkesës së llogarisë nga administratorët dhe nëpunësit e tatim-taksave në çdo njësi për të bërë të mundur rritjen e nivelit të të ardhurave për vitin 2020.
Gjatë analizës vjetore të Bashkisë Maliq janë diskutuar me detaje të gjitha punët e kryera dhe mangësitë e vërejtura gjatë vitit 2019 duke u lënë edhe detyra për përmirësimin e punëve gjatë këtij viti.
