Bashkitë e kanë nisur me këmbë të mbarë vitin 2026. Gjatë pesë muajve të parë të vitit, ato kanë arkëtuar 28.5 miliardë lekë.
Sipas të dhënave të Ministrisë së Financave, kjo shumë është 57% më e lartë se plani i parashikuar për këtë periudhë.
“Arsyet kryesore lidhen me performancën e administratës vendore. Mendoj se ka pasur zgjerim të bazës së taksave dhe administrimi ka qenë më efikas. Një arsye tjetër është se kjo periudhë raportimi përkon me pagesën e detyrimeve të tremujorit të parë të vitit 2026, çka do të thotë se bizneset dhe qytetarët kanë shlyer detyrimet e tyre sipas afateve”, tha Agron Haxhimali nga Instituti i Bashkive
Përveç tejkalimit të planit, bashkitë kanë shënuar një ecuri pozitive edhe në krahasim me të njëjtën periudhë të një viti më parë.
Në periudhën janar–maj janë mbledhur rreth 13 miliardë lekë më shumë se në të njëjtën periudhë të vitit 2025, duke krijuar më shumë hapësira financiare për investime.
“Vitin e kaluar kishim një problem, sepse të ardhurat grumbulloheshin, por nuk shpenzoheshin. Çdo bashki ka planin e saj buxhetor afatmesëm dhe afatgjatë. Besoj se për shumicën e bashkive prioritet mbeten infrastruktura rrugore, infrastruktura arsimore dhe projektet e urbanizimit”, shtoi Haxhimali.
Megjithatë, sipas Institutit të Bashkive, sfida kryesore mbetet mënyra se si shpenzohen këto fonde.
“Ajo që është më e rëndësishme për bashkitë është menaxhimi i mirë i buxhetit, si i transfertave të pakushtëzuara, atyre sektoriale, ashtu edhe i të ardhurave që mbledhin vetë. Nga analiza që kemi bërë si institut, rezulton se edhe për vitin 2025 rreth 75% e këtij portofoli është përdorur për paga dhe sigurime shoqërore, ndërsa vetëm rreth 20% ka shkuar për investime kapitale. Kjo tregon se raporti nuk është i balancuar dhe investimet duhet të zënë të paktën 30–40% të buxhetit për të nxitur zhvillimin e ekonomisë vendore”, tha ai.
Përveç të ardhurave që sigurojnë nga taksat mbi ndërtesat dhe taksat e tjera vendore, bashkitë kanë në dispozicion edhe 46 miliardë lekë nga buxheti i shtetit për vitin 2026.
