Presidenti Ilir Meta reagoi për ngjarjen e rëndë të ndodhur në magazinën e një qendre tregtare, që u përfshi nga një zjarr masiv. Teksa kanë kaluar shumë orë pa marrë asnjë sinjal nga roja i sigurisë, që ka ngecur brenda, Meta kërkon reagim të menjëhershëm nga institucionet.
Duke akuzuar Shërbimin Zjarrfikës se po merret me aktivitete politike, kreu i shtetit deklaroi se duhet të kërkohet ndihmë nga vendet partnere nëse institucionet tona nuk ja dalin dot të vënë nën kontroll situatën në magazinë.
“Alarm për institucionet shtetërore! Prej pasdites së 24 marsit 2021, një tragjedi e vërtetë po ndodh vetëm 3 km larg nga qendra e Tiranës, në ambientet e një biznesi privat, të përfshirë nga flakët, që ende nuk janë shuar. Sipas të dhënave paraprake një qytetar, me detyrën Përgjegjës i Sigurisë, dyshohet edhe për një shtetas të dytë, kanë mbetur të bllokuar në magazinat e katit të nëndheshëm, ndërkohë që dëmi pasuror i biznesit llogaritet në shifra tepër të larta. Duke shpresuar, që kjo ngjarje e rëndë të marrë fund me sa më pak pasoja, u bëj thirrje drejtuesve të Ministrisë së Brendshme dhe asaj të Mbrojtjes, strukturave të Mbrojtjes Civile dhe në veçanti Shërbimit Zjarrfikës të ndërpresin aktivitetet politike, të marrin përgjegjësitë e tyre sipas ligjit dhe të kryejnë me përgjegjshmëri të lartë detyrën e tyre. T’u kërkohet ndihmë vendeve partnere nëse ne nuk i kemi kapacitet për ta menaxhuar këtë situatë, por qëndrimi duarkryq është i papranueshëm dhe i dënueshëm. U bëj thirrje të fortë institucioneve shtetërore të reagojnë sa më parë për t’i dhënë zgjidhje të menjëhershme kësaj situate tepër të rëndë dhe me pasoja tepër serioze”, tha Ilir Meta në “Facebook”.
