Partia Socialiste do të ketë një platformë online për të vlerësuar deputetët aktualë. Platforma u prezantua nga kryeministri Edi Rama këtë të diel në një komunikim nga selia e PS. Ai deklaroi se me anë të kësaj platorme digjitale, do t’i jepet mundësia çdo anëtari të PS për të vlerësuar me notë deputetët.
“Ne do të bëjmë këtë process për të dëgjuar çdo anëtar partie lidhur me deputetët në qarkun e vet. Ata do të japin një vlerësim me pikë nga 1 tek 5, ku sigurisht 1 është vlerësimi më i ulët, 5 më i larti, për si i sheh çdo deputet dhe deputete pas kësaj periudhe përfaqësimi Këto vlerësime do të na ndihmojnë shumë për të kuptuar nivelin e marrëdhënieve mes anëtarëve dhe deputetëve dhe për të krijuar skuadrën që do të fitojë në 25 prill.”
Kreu i PS premtoi se në ditët në vijim një platformë e ngjashme do të krijohet edhe për qytetarët, për të dëgjuar zërin e tyre për deputetët.
“Në ditët në vijim do të hapim edhe një proces tjetër që do të jetë përmes platformës së PS, por i ndarë në dy grupe, jo vetëm për anëtarësinë e PS, por për të gjithë publikun lidhur me deputeët që njerëzit duan. Nuk do të shohim krah, nuk do të shohim kush është kush, çdokush do të ketë mundësinë të japë opinionin për figura që kanë respekt dhe kanë mbështetje në komunitete të ndryshme, për të pasur një mundësi vlerësimi dhe gjykimi në shkallë të gjerë.”
Edi Rama garantoi se vlerësimi i anëtarësisë për deputetët do të jetë i fshehtë. Sipas tij, çdo anëtar do të ketë kredencialet e tij, që do t’i dërgohen me postë. Afati për të kryer gjithë këtë proces është fundi i nëntorit.
“Do të jetë një vlerësim i fshehtë, i garantuar plotësisht në raport me çdonjërin, çdokush mund të bëjë vlerësimin e vet pa patur pasiguri se vlerësimi i tij do të shihet nga ata që vlerësohen dhe se kjo do të shkaktojë problem. Ky vlerësim do të merret dhe analizohet në mënyrë të drejtpërdrejt me vetë deputetët. Afati që kemi lënë është i arsyeshëm, duke qenë se bëhet fjalë për një praktikë të re. Do të jetë fleksibël, kemi vendosur një afat paraprak fundin e nëntorit. Brenda vitit të kemi qartësi mbi skuadrën që kemi dhe mbi rezervat e reja për të futur në skuadër.”
Edi Rama nxiti anëtarësinë të marrë pjesë në këtë proces.
