Të nominohesh si artistja më e mirë e vitit, apo për çfarëdolloj titulli gjatë ndarjes së çmimeve Grammy është një ndër arritjet më të mëdha për një artist, e Bebe Rexha këtë vit mund të rrëmbejë dy trofe më 10 shkurt datë kur do të mbahet kjo ceremoni. Por veç emocioneve të papërballueshme, artistja 26-vjeçare duket të ketë probleme më të mëdha, si për shembull veshja.
Është një natë e madhe për të por që ka ardhur me një problem të papritur. Rexha thotë se shumë stilistë kanë refuzuar ta veshin atë, sepse sipas tyre masa M, (38) është shumë e “madhe” për ta.
Rexha postoi një video në Instagram ku tregonte me detaje situatën dhe komentuesit duket se janë të gjithë në mbështetje të këngëtares.
“Më në fund u nominova për çmimet Grammy dhe kjo është gjëja më fantastike që më ka ndodhur. Shumë artistë do të flasin dhe do të përpiqen të qepin fustanet më të bukura nga stilistë me famë, vetëm për të ecur mbi tapetin e kuq. Të njëjtën gjë bëri dhe skuadra ime, kërkoi për një stilit që të qepte posaçërisht një fustan për mua dhe përgjigja më e shpeshtë që morën: Jam masë e madhe dhe s’mund të më veshin. Nëse ju quani masën 36 apo 38 , pra S dhe M, të madhe, nuk di se çfarë të them. Atëherë nuk dua t’ia di për stilistët sepse sipas tyre të qenët kjo masë do të thotë që nuk je e bukur e nuk mund të veshësh një fustan. Pra për të gjithë njerëzit që thonë jam e shëndoshë e nuk mund të vesh fustan, vafshi në djall, thjesht nuk do vesh fustanin tuaj.”
Pas publikimit të videos dhe komentit me të cilën e shoqëronte, kjo e fundit u bë virale./ Living
