Deputeti Redi Muçi tha në studion e QUO VADIS në Vizion Plus se Lëvizja Bashkë nuk është pjesë e organizatorëve të protestës që po zhvillohet në Tiranë për të 26-tën ditë.
Ai nënvizoi se këkesat kanë dalë nga një grup të rinjsh në protestë. Sipas Muçit, fillimisht janë paraqitur pesë pika kryesore, ndërsa më pas listës i janë shtuar edhe kërkesa të tjera që ai i cilëson si legjitime.
Deputeti nënvizoi se kërkesa më e rëndësishme mbetet dorëheqja e kryeministrit Edi Rama.
Duke folur për një skenar të mundshëm të zgjedhjeve të parakohshme, Muçi deklaroi se ato do të ishin vendimtare për situatën politike në vend.
Pjesë nga biseda:
Borakaj: Kush vendos? Kush mblidhet për kërkesat? Si organizohet?
Muçi: Nuk jam në dijeni të detajeve, sepse ne nuk jemi pjesë e grupit të organizatorëve, por di që një grup ka dalë nga protesta, rreth 15-20 veta. Në fillim dolën 5 pika, tani listës i janë shtuar edhe kërkesa të tjera që, për mendimin tim, qëndrojnë. Ne “Lëvizja Bashkë”, deri tani nuk kemi pasur koordinim. Gjëja më e rëndësishme është kërkesa e parë, dorëheqja e Ramës. Kërkesat janë të gjitha legjitime. Pjesë e kërkesave është edhe krijimi i një qeverie tranzitore për 12 muaj. Që të ndodhin të gjitha këto, vendosin deputetët. Flitet për qeveri tranzitore, por qeveria do të zgjidhet nga parlamenti. Problemi është që çfarë do arrijë kjo qeveri teknike? Frika jonë është që nëse do kenë një qeveri teknike nga 82 votat e PS dhe 50 të PD, nuk mendojmë se do përfaqësojë atë që do populli. Shpallja e zgjedhjeve të parakohshme, qoftë edhe me 45 ditë, 60 ditë, do bënte që i gjithë ky vullnet të kthehej në vota.
Borakaj: Nëse do kishte zgjedhje pas 45 ditësh, mendoni se do rrëzohej pushteti i Ramës?
Muçi: Padiskutim që po.
/vizionplus.tv
