Në një intervistë për televizionin publik në Kosovë kryeministri në detyrë i Malit të Zi, Dritan Abazoviç, teksa u pyet për marrëveshjen e arritur mes tij dhe Kishës Ortodokse Serbe, mohoi që ky të ishte shkaku pse u rrëzua nga posti i kreut të ekzekutivit. Ai tha se ende është i vendosur për marrëveshjen.
“Ka shkuar Gjukanoviçi e jo unë. Nuk mund të lëvizini gjërat pa dashur të lëvizni nga zona e rehatisë. E kemi më të lehtë të ecim përpara kur të drejtën për ta bërë këtë ua japim edhe të tjerëve. Kështu e shoh politikën.”
Abazoviç u shpreh se marrëveshja me Kishën Ortodokse Serbe, është model të cilin edhe Kosova mund ta zbatojë pa asnjë telash.
“Kur të relaksohet populli, vetëm përfitohet. Nuk them në mënyrë të njëjtë, por si model mund ta ketë edhe Kosova atë marrëveshje me Kishën Ortodokse.”
Sa i përket zgjedhjeve të ardhshme në Mal të Zi, kryeministri në detyrë u shpreh se partia tij është me këmbë në tokë dhe se nuk duhet tepruar me ambiciet politike.
