Kryeministrja italiane Giorgia Meloni ka riafirmuar angazhimin e Italisë për të përmbushur detyrimet ndaj NATO-s, duke theksuar se rritja e investimeve në mbrojtje do të bëhet në mënyrë të qëndrueshme dhe gjithmonë në funksion të interesit kombëtar.
Në përfundim të samitit të NATO-s në Ankara, Meloni foli për prioritetet e qeverisë së saj, marrëdhëniet me presidentin amerikan Donald Trump, situatën shqetësuese në Iran, mbështetjen për Ukrainën dhe kritikat e opozitës italiane.
“Ne duam të respektojmë angazhimet tona për shpenzimet në mbrojtje. Po e bëjmë këtë dhe do të vazhdojmë ta bëjmë, por në mënyrë të qëndrueshme, duke përcaktuar vetë kohën, mënyrat dhe prioritetet sipas kontekstit”, tha ajo.
“Investimet që bëjmë duhet të mbeten në Itali, në fabrikat tona, në qendrat tona të kërkimit dhe në territoret tona. Kjo do të thotë më shumë siguri, por edhe më shumë vende pune të kualifikuara, më shumë kërkim dhe jo çeqe që përfundojnë jashtë vendit,” shtoi më tej.
Lidhur me sulmet dhe kritikat e përsëritura të presidentit amerikan Donald Trump gjatë javëve të fundit, Meloni u shpreh se nuk është penduar për asgjë nga qëndrimet e saj.
“Nuk pendohem për asgjë që kam bërë. Nuk do ta ndryshoj strategjinë time. Investimin politik e kam bërë sepse besoj në unitetin e Perëndimit. Nuk është një strategji që ka lindur me ardhjen e Trump, por është qasja që kam me të gjithë bashkëbiseduesit e mi. Me Trump kemi afërsi në disa tema, si emigracioni apo kultura ‘ëoke’. Gjërat po zhvillohen siç i kemi parë, por unë nuk ndryshoj mendim,” tha ajo.
