Juristi Ermal Yzeiraj, i ftuar këtë të enjte në Quo Vadis të moderatores Pranvera Borakaj, ka komentuar seancën e Gjykatës Kushtetuese për vendimin e GJKKO-së mbi pezullimin e zv.kryeministres Belinda Balluku.
Yzeiraj tha se GJKKO është nxituar, pasi nuk ka kompetencë për pezullimin nga detyra të zv.kryeministres. Sipas tij, imuniteti i deputetit është i njëjtë me atë të ministrit.
Pjesë nga biseda:
Borakaj: Jeni pro apo kundër pezullimit?
Yzeiraj: Unë mendoj që vendimi i GJKKO-së është i nxituar. Kushtetuta thotë që imuniteti i ministrit është i njëjtë me atë të deputetit. Nëse e konceptojmë imunitetin e deputetit si një “kostum”, një nga detajet është se nuk pezullohet nga detyra. Pra, Kushtetuta thotë se ky kostum është identik me të parin. Për të dyja “kostumet”, ideja është se nuk pezullohesh nga detyra. Qëndrimi im është se, ashtu siç nuk pezullohet nga detyra deputeti, ashtu nuk duhet të pezullohet as ministri.
