Një granatë dore ka shpërthyer në postën e Kosovës në Zveçan gjatë mesnatës. Lajmi është konfirmuar nga policia. Fatmirësisht nga ky sulm nuk ka patur të lënduar, por vetëm dëme materiale. Lidhur me ngjarjen ka reaguar edhe kryeministri i Kosovës Albin Kurti, i cili ka dënuar sulmin dhe ka akuzuar drejtpërdrejt Serbinë.
“Qëndrimi në liri i kriminelit Radoiçiq dhe mosdorëzimi i tij autoriteteve të shtetit tonë është një mesazh i rrezikshëm që inkurajon kriminelë e terroristë, ekstremistë të ndryshëm, që të vazhdojnë veprimet e tyre me tendencë destabilizuese. Përmes krijimit të tensioneve artificiale, po tentohet të pengohet funksionimi normal i institucioneve dhe të minohet zhvillimi ekonomik e përparimi demokratik i vendit tonë”, tha Kurti.
Kurti shtoi se institucionet po kryejnë hetimet për të sjellë para drejtësisë autorët e aktit, teksa theksoi se Kosova mbetet e përkushtuar ndaj paqes dhe stabilitetit rajonal.
Edhe kreu i AAK-së, Ramush Haradinaj ka reaguar për shpërthimin brenda objektit të Postës së Kosovës në Zveçan, duke thënë se përms ketij akti dëshmohen qartë qëllimet agresive të Serbisë.
Në katër komunat me shumicë serbe në veri të Kosovës janë mbyllur shumë institucione paralele serbe, si dhe zyra postare që nga fillimi i vitit të kaluar.
Dega e postës së Kosovës në Zveçan u hap më 27 mars, në të njëjtën ditë kur u hap edhe në Zubin Potok – të dyja komuna me shumicë serbe. Më parë në këtë objekt ndodhej dega e bankës së Serbisë, që u mbyll në maj të vitit të kaluar.
