Partia Demokratike ka hapur këtë të hënë fushatën elektorale për zgjedhjet vendore të 14 majit.
Enkelejd Alibeaj, kreu i komanduar i PD, fokusin e fjalës së tij e pati tek kundërshtarët direkt dhe ato brenda llojit. Përpara mbështetësve të tij brenda radhëve të PD, Alibeaj theksoi se pjesa e ndarë nga po e njëjta forcë në fakt i shërben pushtetit të Ramës. Akuzat e tij shkonin paralel dhe me banderolën pas shpinës së tij, ku shfaqeshin Rama, Berisha dhe Meta me mbishkrimin: “Po votove njërin i merr të tre”.
Alibeaj e konsideroi PD si parti e ngritur nga ëndrrat e të rinjve shqiptarë duke shtuar se qëllimi i kësaj force politike nuk mund të devijohet. Kreu i PD akuzoi Berishën se po përdor zgjedhjet e 14 majit për t’iu kundërvënë SHBA që e ka shpallur “non-grata” e lidhur me këtë fakt, ai shton se askush që është në listat e zeza të SHBA nuk mund të jetë pjesë e PD.
“Edhe pse ish-kryetari Lulzim Basha dha dorëheqjen për të mos e vazhduar përçarjen, me pretendimin logjik që të njëjtën gjë ta bënte dhe Sali Berisha, me qëllim që demokratët të shkonin drejt një procesi dhe të ndalej kjo përçarje dhe dhuna e brendshme verbale ose fizike, Sali Berisha vazhdoi veprimet e tij të njëanshme.
Ai bëri kongres të njëanshëm në 30 prill, bëri zgjedhje të njëanshme duke u zgjedhur apo vetëzgjedhur kryetar i PD-së dhe duke përmbysur çdo rregull apo logjikë politike.
Ai, vazhdoi duke mashtruar demokratët se është njeriu që do ti çonte në fitore, dhe kush?!
Ai që humbi në vitin 2013!
Jo vetëm kaq. Ai që në fund të korrikut të këtij viti prej qeverisë konservatore britanike u shpall non-grata.
Dhe ajo nuk ishte qeveri soroiste, ishte qeveri e partisë sonë simotër, ishte qeveri anti-soroiste dhe e shpalli me të njëjtat terma non-grata Sali Berishën, tashmë me një dosje të plotë të vënë përpara syve të tij.
Duke pretenduar se do të rrëzonte për disa ditë qeverinë apo Edi Ramën, por në koordinim të thellë me të, ai organizoi procesin e njëanshëm të primareve duke manipuluar dhe gënjyer demokratë për shanset për pushtet të një partie të udhëhequr nga non-grata, shanse të cilat thjesht nuk ekzistojnë.
Megjithatë, qëndrimin tonë të arsyeshëm për bashkim ai e refuzoi duke bërë një proces të njëanshëm primaresh”, tha ai.
Nga ana tjetër, Berisha akuzon Alibeajn se punon për të mbajtur Ramën në pushtet.
