Venezuelë – Dy tërmete të fuqishme me magnitudë 7.2 dhe 7.5 goditën kryeqytetin venezuelian dhe zonat përreth të mërkurën në mbrëmje, duke shkaktuar shkatërrime të mëdha dhe panik në mesin e banorëve. Sipas autoriteteve, të paktën 160 persona kanë humbur jetën dhe qindra të tjerë janë plagosur, ndërsa ekipet e shpëtimit vijojnë kërkimet mes rrënojave.
Tërmetet, të cilat u regjistruan me disa sekonda diferencë rreth orës 18:00 me kohën lokale, lanë pas ndërtesa të shembura, rrugë të mbushura me mbeturina dhe ndërprerje të energjisë elektrik. Në disa zona të Karakasit, banorët janë detyruar të kalojnë natën jashtë, nga frika e pasgoditjeve dhe dëmtimeve të strukturave të banesave.
Dëshmitarët përshkruajnë skena paniku.
“Mendova se do të vdisja,” tha një banore për BBC Mundo, duke kujtuar momentet e lëkundjeve të forta që tronditën kryeqytetin.
“Nuk e kisha menduar kurrë se do të përjetonim diçka të tillë”, tha ajo, e tronditur.
Coro Martinez, një banor në Karakasin lindor, i tha të njëjtën gjë agjencisë së lajmeve Reuters.
“Nuk kam përjetuar kurrë diçka të tillë”, tha 56-vjeçari.
“Pati një përplasje shumë të fortë. Gjërat në shtëpi filluan të rrëzoheshin”.
Autoritetet kanë paralajmëruar se bilanci i viktimave mund të rritet, pasi në disa zona të goditura rëndë ende nuk ka akses të plotë për ekipet e emergjencës. Ndërkohë, në qytet dhe rrethina janë ngritur kampe të përkohshme për strehimin e të mbijetuarve.
Ky është një nga tërmetet më të rënda që ka goditur Venezuelën në dekadat e fundit, duke rikthyer kujtimet e fatkeqësisë së vitit 1967 në Karakas, kur një tërmet i fuqishëm shkaktoi mbi 200 viktima.
