Manchester City-Bayern ishte ashtu sikurse mendohej, një manual i futbollit të fortë dhe spektakolar. Një përplasje gjigantësh në lartësinë e emrit që mban kompeticioni, Uefa Champions League. Madje, keqardhja e vetme është që një duel i tillë mes pretendentësh të mëdhenj, u zhvillua në fazën çerekfinale.
Akti i parë shkoi i gjithi për anglezët, të cilët përmes një paraqitje brilante dërrmuan keq bavarezët 3 me 0 dhe e shohin veten me një këmbë në fazën tjetër. Pjesë e parë me ritëm të jashtëzakonshëm, me dy skuadra që luajnë hapur dhe pa iu trembur njëra-tjetrës, Haland i pari gjeti reagimin e Sommer e pastaj Musiala e pa veten të ndalej mrekullisht nga këmba e zgjatur e Ruben Dias. Për ta ndezur edhe më shumë supersfidën mendoi Rodri, përmes një kryevepre në minutën e 27.
Pak minuta më vonë, Zomer bën një tjetër mrekulli, kësaj radhe duke pritur me këmbë gjuajtjen e Gyndoan. Bayern zgjohet vonë në fundin e pjesës së parë dhe e bën këtë përmes një ishi si Leroi Sane, por pa shënuar. Gjermanët janë të papërmbajtshëm në startin e të dytës, me protagonist të madh sërish Sane, i cili humbet një rast flagrant dhe pastaj e gjen veten të ndalur në dy episode të tjera nga Ederson.
Bajern shtyn përpara, por kjo gjë rezulton në thikë me dy presa, sepse hapësirat e lënë pas, kombinuar me gabimet individuale janë vrastare për gjermanët. Pas një rasti të Diaz, në të 70, gabimi i Upamekanos shfrytëzohet nga Halanda, krosimi i të cilit dërgohet me kokë në rrjetë nga Bernardo Silva.
Gol që vulos kapitullin e parakohshëm të gjermanëve, të cilët ndryshe nga natyra e tyre, shastisen dhe nuk kuptoje më se çfarë ndodh në fushë. Pak minuta më vonë është radha e Haland për të shënuar golin e tretë, i 45 në 39 ndeshje në këtë sezon.
Shifra monstruoze. Bayern është me fat deri në fund, sepse mund të kishte marrë edhe 2-3 gola të tjerë po të mos kishte qenë për një super Zomer. Pas një jave në Aliaz, bavarezëve do t’i duhet një ndeshje epike, për të shpresuar tek kualifikimi.
Në pozita shumë komode edhe Interi që mundi 2 me 0 në Portugali Benficën, duke hipotekuar kualifikimin për në fazën gjysmëfinale.
Ndeshje shumë më e lehtë sesa mendohej për italianët në Da Luz, në folenë e shqiponjave.
Në pjesën e parë vetëm një mundësi e vendasve me Rafa Silvën, asgjë më tepër, më pas kapitullimi i luzitanëve në pjesën e dytë.
Barella shënoi golin e parë në minutën e 51, pas një krosimi perfekt të Bastonit. 10 minuta para fundit dyfishimi i rezultatit nga Lukaku me penallti, pas një topi të prekur me dorë nga Zhoao Mraio. Të dyja supersfidat u transmetuan në Tring, ndërsa duelet e kthimit do të luhen në 19 prill.
