Nënkryetari i Partisë Demokratike, Oerd Bylykbashi foli sot në parlament për protestën e qytetarëve e cila ka hyrë në ditën e 12.
Bylykbashi deklaroi se ka ardhur koha që Kuvendi t’iu përgjigjet atyre qytetarëve, duke garantuar të drejtën për votën e lirë, të kenë të drejtë për të pasur një drejtësi që nuk kapet, që të mos të jetë Kryeministri i cili vendos ditën e mirë dhe të keqe për ata.
Bylykbashi theksoi se duhet patjetër të zhbëjmë këtë antisistem që ka një emër, Edi Rama!
“Sot është ditë shumë e rëndësishme, sepse pikërisht sot u rrëzua pikërisht ajo që ju pesë vite më parë ndërtuat me kujdes, vetëm e vetëm për një gjë, në kuadër të ngritjes së një antisistemi, i cili zhbën këtë dokument. Ky është dokumenti që ndërton sistemin e demokracisë për shqiptarët, garanton të drejtat e shqiptarëve! Dhe ajo që keni bërë në gjithë këto vite, keni ngritur një antisistem me në krye Edi Ramën vetëm e vetëm për të bllokuar atë që garanton të drejtat individuale të çdo shqiptari dhe të gjithë shqiptarëve bashkë! Sot është dita e 12, në mos gaboj, që shqiptarët, të rinj, të reja, studentë, familjarë bashkë me fëmijët e tyre, të moshuar janë në shesh. Ata në fakt nuk po protestojnë kundër sistemit. Ata po kërkojnë t’i rikthehet kjo që u garantohet. Kjo që dikur u votua me një referendum. Kjo që është e vetmja mënyrë që na bën të gjithë bashkë. Po pikërisht zhbërja e kësaj në këto 13 vitet e Edi Ramës ka bërë që të zbrazet Shqipëria. Megjithatë, kjo gjeneratë që ka vendosur të dalë atje në shesh ka vendosur të thotë JO! Ne duam të na rikthehen të drejtat! Këtu kjo Kushtetutë thotë që shqiptarët e ushtrojnë vullnetin nëpërmjet përfaqësuesve të tyre ose drejtpërdrejt. Por në fakt ua keni hequr këtë të drejtën që të dalin drejtpërdrejt. Sot ata nuk kanë, për shembull, të drejtën që të bëjnë një referendum. Nëse të gjithë ata që kanë firmosur atë peticion me një milion e shtatëqind mijë vetë për largimin e Edi Ramës, do të shkonin në referendum edhe për anëtarësim në Bashkimin Europian, do humbiste peticioni. Pse? Se e keni bllokuar ju! E keni bllokuar sistemin! Sot ne duhet patjetër të zhbëjmë këtë antisistem që ka një emër,
Edi Rama!
Që ka zhbërë edhe të drejtën për tu përfaqësuar. E dini shumë mirë, shumë prej jush, jo të gjithë ndoshta, por shumë prej jush e dinë shumë mirë çfarë skeletesh kanë në dollapet e tyre. Do vijë dita kur prokuroria do t’ju vijë nga mbrapa, sepse e dini shumë mirë që një pjesë prej jush keni ardhur në parlament, sepse keni bërë atë që ka kërkuar antisistemi. Ka ardhur koha t’iu përgjigjemi atyre qytetarëve. Të bëjmë të gjitha ato ndryshime që zhbëjnë bllokimin e të drejtave të tyre. Të kenë të drejtë për votën e lirë, të drejtë! Të kenë të drejtë që të kenë një drejtësi që nuk kapet! Të mos të jetë Kryeministri i cili vendos ditën e mirë dhe të keqe për ata! Po kjo sallë këtu, me kolegjialitet jo njëshi!”
