Kreu i Partisë së Lirisë Ilir Meta ka caktuar Genc Gjokutaj si avokatin e tij për të ndjekur ligjërisht kallëzimin që ai ka dorëzuar në SPAK për Autoritetin e Dosjeve.
Në një postim në Facebook, Meta shprehet i bindur për zbardhjen e plotë të falsifikimi të dokumentave që janë bërë, teksa shton se faktorët do përballen me ligjin.
“Një ditë pas kallëzimit penal për anëtarët e Autoritetit të Dosjeve, ndërmorra sot hapin tjetër të radhës të caktimit të z.Genc Gjokutaj, avokat dhe ish-prokuror i njohur, për të ndjekur ligjërisht këtë çështje në funksion të një procesi të rregullt ligjor, por edhe transparent para të gjithë qytetarëve shqiptarë.
Jam i bindur në diskreditimin e plotë të këtij manipulimi dhe falsifikimi ndër më të rëndët në historinë e pluralizmit politik.
Falsifikatorët do të përballen me të gjithë forcën e ligjit!”, shkruan Meta.
