Autoritetet tajlandeze kanë arrestuar një shtetas australian 46-vjeçar, i cili konsiderohet i dyshuari kryesor për vrasjen makabre të një vajze 17-vjeçare, trupi i së cilës u gjet i futur në një valixhe.
I dyshuari u ndalua në aeroportin ndërkombëtar Suvarnabhumi në Bangkok, ndërsa po përpiqej të blinte një biletë për t’u larguar drejt Perthit, Australi. Sipas policisë së Pattayas, ai u vu menjëherë në paraburgim pas marrjes në pyetje, megjithëse vazhdon të mohojë akuzat.
Pamjet filmike çuan në identifikimin e tij
Hetuesit arritën ta identifikonin të dyshuarin pas analizimit të kamerave të sigurisë. Në pamje ai shihet duke hyrë në një ndërtesë në zonën turistike të Pattayas së bashku me 17-vjeçaren tajlandeze gjatë natës së të mërkurës.
Disa orë më vonë, i njëjti person shihet duke dalë i vetëm nga ndërtesa, duke transportuar me vështirësi një valixhe të madhe të zezë, të cilën e vendosi në pjesën e pasme të një skuteri.
Trupi u gjet pranë shinave të trenit
Një ditë më pas, policia gjeti valixhen të hedhur pranë linjës hekurudhore. Brenda saj u zbulua trupi i pajetë i 17-vjeçares, i cili kishte shenja të dukshme dëmtimesh, sipas mediave lokale.
Autoritetet janë në pritje të rezultateve zyrtare të autopsisë dhe analizave laboratorike. Pas përfundimit të hetimeve, pritet që ndaj 46-vjeçarit të ngrihen akuza të rënda për vrasje, rrëmbim të një të miture me motiv seksual dhe fshehje të trupit të viktimës.
