Kreu i FRPD, Belind Këlliçi mori një gjobë 50 milionë lekë të vjetër për shkeljen e masave anti-COVID. Pasi u njofuta për gjobitjen, Këlliçi shpërtheu në rrjetet sociale ndaj policisë.
Sipas tij, edhe personalitete të qeverisë kanë kryer takime elektorale, por nuk janë gjobitur.
“Kjo është gjoba 50 milionëshe për opozitën! Policia më ka gjobitur me pretendimin se kam shkelur fjalën-urdhër të kryeministrit, për organizim në mjedise të mbyllura me mbi 10 vetë. Edi Rama i pari, dhe banda e tij me ne krye Veliajn, Spiropalin, Ballukun, po organizojnë takime me punonjës të administratës, me pjesëmarrje 100-200 vetë, ku Policia kujdeset vetë për organizimin, që nga vendosja e karrikeve deri te listë-prezenca e duartrokitësve. Akti teatral i radhës ishte gjobitja ndaj Erion Veliaj. Komisioni i Ankimeve dhe Sanksioneve ka shfuqizuar dy dënimet me gjoba për Veliajn, sepse nuk ka konstatuar shkelje nga ana e Veliajt dhe ka shfuqizuar gjobat me 35 mijë lekë dhe 40 mijë lekë. Gjobat janë vetëm për opozitën. Janë për këdo që i bën opozitë urdhërave të Ramës. Keni edhe 66 ditë kohë per te vendosur gjoba antikushtetuese. Pastaj ju pret 25 prilli. Asnjë hap pas 💪🏻”, u shpreh Belind Këlliçi.
Ky është emri i dytë brenda PD që gjobitet për takimet elektorale në kohë pandemie, pas gjobës që mori nënkryetari Edmond Spaho.
