Marrëdhëniet tregtare mes Pekinit dhe Uashingtonit po shkojnë drejt përmirësimit ndërsa Kina ka anuluar disa tarifa ekonomike në mallrat e Shteteve të Bashkuara, vendim që ishte parashikuar të hynte në fuqi më 15 dhjetor, për shkak të fazës së parë të marrëveshjes midis dy vendeve të premten.
Tarifat e vendosura nga Kina për produktet amerikane synonin misrin, grurin dhe disa pjesë të veturave ndërsa tarifat e tjera të vendosura ndaj prodhimeve të SHBA-së, do të vazhdojnë ashtu siç janë, kanë deklaruar nga Ministria e Financave të Kinës.
Zyrtarët në Pekin kanë shtuar se “Kina shpreson në bazat e barazisë dhe respektit reciprok, të bashkëpunojë me SHBA-në për të zgjidhur problemet dhe të promovohen zhvillimet e qëndrueshme të ekonomisë së të dyja vendeve”.
Presidenti amerikan, Donald Trump deklaroi se negociatat për marrëveshjen në fazën e dytë do të fillojnë menjëherë pasi nuk ka kuptim të pritet deri pas zgjedhjeve të vitit 2020.
Nëse tarifat e reja, do të kishin hyrë në fuqi, atëherë mallrat e prodhuara nga Kina, siç janë: telefonat, rrobat dhe lodrat, do të ishin bërë më të shtrenjta për amerikanët, para festës së Krishtlindjes.
Zyrtarët kinezë thanë se “marrëveshja do të sigurojë mbrojtje më të madhe për kompanitë e huaja në Kinë, si dhe kompanitë kineze në SHBA”.
Dy ekonomitë më të mëdha në botë janë përfshirë në një konflikt tregtar për më shumë se një vit, duke goditur njëra-tjetrën me tarifa të mallrave në vlerë qindra miliarda dollarë.
