Partia Demokratike po zhvillon sot punimet e Kuvendit Kombëtar në Pallatin e Kongreseve në Tiranë. Kuvendi mblidhet një javë pas zgjedhjeve brenda partisë, ku Sali Berisha u rikonfirmua në krye të PD-së me 37 mijë e 341 vota, si kandidati i vetëm në garë.
Në kuvend marrin pjesë edhe përfaqësues të partive simotra dhe miq ndërkombëtarë të demokratëve, të cilët janë përshëndetur nga kreu i PD-së gjatë fjalës së tij.
Në fjalën e tij, Berisha theksoi se Partia Demokratike, ka qenë pjesë e përpjekjeve për rrëzimin e diktaturës në Shqipëri në fillim të viteve ’90 dhe se sot, sipas tij, vendi përballet me një formë të re autoritarizmi.
“35 vite më parë përmbysëm një diktaturë… tani do përmbysim diktaturën e Edvin Ballukut, diktaturën më të shëmtuar midis diktaturave autokratike”, u shpreh Berisha.
Ai përmendi gjithashtu bashkëpunimin me parti dhe figura të huaja politike, duke i cilësuar si aleatë dhe miq të PD-së në rrugëtimin e saj.
Gjatë punimeve të Kuvendit, Sali Berisha vlerësoi mbështetjen e demokratëve në rrugëtimin politik të partisë dhe sfidat e viteve të fundit. Ai tha se rithemelimi i PD-së erdhi në një moment kritik dhe se përballja me, siç e quajti ai, “narkoshtetin”, ishte e pashmangshme për opozitën.
Në vijim të fjalës së tij, Berisha theksoi se besimi i tij ndaj demokratëve nuk ka ndryshuar kurrë, duke e cilësuar atë si themelin e marrëdhënies së tij me partinë.
“Vetëm në një gjë nuk kam gabuar kurrë, në besimin ndaj jush. Kjo parti as nuk blihet, as nuk shitet kurrë, as nuk mposhtet kurrë. U ngritëm në një kohë kur dukej se edhe tokën, edhe qiellin e kishim kundër nesh. Por u ngritëm në atë kohë se ishim të pathyeshëm në besimin tonë tek e vërteta.
U ngritëm, na e imponuan, jo se deshëm, por midis të gjithave, ne zgjodhëm të mbrojmë të vërtetën. Ndaj dhe ju, uleni sot këtu krenarë, ju dhe çdo demokrat, krenarë sepse vini në këtë sallë dhe kudo që jeni, gardianë të pluralizmit politik në Shqipëri. Gardianë të sovranitetit të kombit shqiptar. Gardianë të pamposhtur të vlerave të lirisë, të dinjitetit njerëzor.”, u shpreh Berisha.
