Plan masash për bizneset e dëmtuara nga protestat, eksperti: Pasojat ekonomike mund të zgjasin me vite

Eksperti i ekonomisë, Igli Tola, i ftuar në edicionin informativ të lajmeve në Vizion Plus, me moderator Arnold Kariqin, ka komentuar pasojat ekonomike të protestave dhe dëmet e shkaktuara ndaj bizneseve. Duke iu referuar të dhënave të administratës tatimore për rreth 120 biznese të dëmtuara, Tola theksoi se mbështetja duhet të përqendrohet veçanërisht te bizneset e vogla dhe të mesme, të cilat kanë më pak mundësi financiare për të përballuar ndërprerjen e aktivitetit.

Sipas ekspertit, kompensimi nuk duhet të kufizohet vetëm te dëmet fizike, si vitrinat, dyert apo ambientet e shërbimit, por duhet të marrë në konsideratë edhe të ardhurat e munguara gjatë ditëve kur bizneset kanë punuar me orar të kufizuar ose kanë qëndruar të mbyllura. “Nuk duhet menduar thjesht për mbulimin e kostove të dëmeve fizike, por njëkohësisht edhe për fitimin e munguar. Nevojitet mbështetje nga organet publike, të paktën për mbulimin e shpenzimeve bazë operative”, u shpreh Tola.

Ai nënvizoi se vonesat në procesin e verifikimit dhe kompensimit mund të krijojnë kosto shtesë për sipërmarrjet, të cilat detyrohen të përdorin kursimet e tyre ose të marrin hua për të rikthyer aktivitetin normal. Tola theksoi se bizneset duhet të përballojnë detyrime të vazhdueshme, si pagat e punonjësve, qiratë, këstet e kredive dhe detyrimet tatimore, edhe kur të ardhurat mungojnë. Për këtë arsye, sipas tij, vetëdeklarimi i dëmeve nuk mjafton dhe nevojitet një bashkëpunim më i ngushtë mes institucioneve publike dhe subjekteve të prekura.

Një tjetër shqetësim i ngritur nga eksperti lidhet me ndikimin afatgjatë të protestave në ekonominë shqiptare dhe në klimën e investimeve. Sipas Tolës, paqëndrueshmëria social-politike mund t’i shtyjë investitorët e huaj të pezullojnë vendimmarrjen për projekte të reja, ndërsa kompanitë që operojnë në vend mund të shqyrtojnë zhvendosjen e aktivitetit. Ai paralajmëroi gjithashtu se ulja e konsumit dhe ndërprerja e aktivitetit ekonomik mund të reflektohen në treguesit ekonomikë të tremujorit, duke theksuar se pasojat e situatës shkojnë përtej dëmeve materiale dhe mund të ndihen edhe në vitet në vijim.

/vizionplus.tv