Pesë persona u vranë dhe 34 të tjerë u plagosën në SHBA, kur një autobus u përplas me gjashtë automjete në autostradën ndërshtetërore 95, në shtetin amerikan të Virxhinias, në orët e para të ditës së sotme.
Sipas autoriteteve, autobusi nuk arriti të ngadalësonte pasi trafiku po ngadalësohej për shkak të ndërtimit të rrugës, duke shkaktuar një aksident vdekjeprurës zinxhir.
Siç raporton BBC, të paktën 34 persona u dërguan në spitale, tre prej të cilëve në gjendje kritike. Pesë të vdekurit ishin në automjetet e goditura nga autobusi.
Hetimi mbi rrethanat e aksidentit po vijon. Të dhënat fillestare të hetimit të policisë tregojnë se autobusi “nuk ngadalësoi pavarësisht ngadalësimit të trafikut” dhe u përplas me gjashtë automjetet përpara zonës së ndërtimit.
Ende nuk dihet se për çfarë është përdorur autobusi ose kush ndodhej në të në kohën e përplasjes.
Policia tha se përplasja fatale ndodhi rreth orës 02:35, në Qarkun Stafford. Korsitë në drejtim të jugut u mbyllën për rreth shtatë orë, me trafikun që u devijua në rrugë alternative.
Zëdhënësi i Policisë Shtetërore të Virxhinias, Matthew Demline, i tha BBC-së se autostrada tani ishte rihapur për trafik.
