Parlamenti britanik po përballet me një situatë kaosi ndërsa një numër gjithnjë në rritje deputetësh janë rebeluar kundër kryeministrit Boris Johnson. Deputeti konservator, Philip Lee, ka braktisur partinë duke i’u bashkuar opozitës. Kjo do të thotë se kryeministri britanik, ka humbur shumicën në parlament.
“Qeveria konservatore po e vazhdon në mënyrë agresive procesin e Brexit-it me pasoja të dëmshme. Ai po rrezikon dhe kërcënon padrejtësisht integritetin e Britanisë së Madhe”, u shpreh Lee.
Fjala e kreut të ekzekutivit është ndërprerë disa herë pasi situata është përshkallëzuar në debate të ashpra. Boris Johnson, deklaroi se dalja nga BE me marrëveshje është skenari më i mirë dhe duhet punuar në këtë drejtim.
“Planet tuaja për të miratuar legjislacionin që bllokon daljen pa marrëveshje më 31 tetor shkatërrojnë çdo shans për të negociuar një marrëveshje të re. Vendi do të largohet nga BE deri më 31 tetor në të gjitha rrethanat. Nuk do të ketë më vonesë të pakuptimtë. Ne do të takohemi intensivisht këtë muaj me përfaqësuesit e Brukselit për të shtuar mundësitë në arritjen e një marrëveshje, pasi kjo do të ishte zgjidhja më e mirë.”, tha Johnson.
Boris Johnson ka thirrur me urgjencë kabinetin qeveritar nga ku ka ashpërsuar gjuhën ndaj gjithë atyre që, sipas tij, po përpiqen të shkatërrojnë Britaninë. Nga ana e saj, opozita laburiste po përpiqet të tregojë se është e gatshme të shkojë në zgjedhje të parakohshme dhe vazhdon të akuzojë kryeministrin si menaxhues i keq i dosjes Brexit.
