Disa orë pas reagimit të ministrit të jashtëm turk Mevlut Cavusoglu, i cili bëri të qartë se Ankaraja nuk do të lejojë zgjerim të ujërave greke në asnjë pjesë të detit, as në Jon dhe as në Egje, këtë të mërkurë Ministri i Mbrojtjes i Turqisë, Hulusi Akar përforcoi qëndrimin Ai tha se vendi i tij do të marrë masat e nevojshme në rast te ndonjë veprimi qe dëmton interesat e Turqisë.
Hulusi Akar: “Në rast se marrin ndonjë vendim në kundërshtim me marrëveshjet, të drejtën ndërkombëtare, me marrëdhëniet e mira fqinjësore, është e hapur dhe e qartë se çfarë do të bëjmë kundër kësaj. Qëndrimi ynë është i qartë. Kemi çdo lloj mase. Dëshiroj që gjithkush ta dijë se nuk do të lejojmë në asnjë mënyrë fakt të përfunduar në lidhje me këtë çështje”.
Reagimi vjen pak pasi ish ministri i jashtëm i Greqisë Nikos Kotzias, tha se vendi i tij do të zgjerojë kufirin detar nga 6 në 12 milje. Një ditë më pare Ankaraja thirri ambasadorin grek Petros Mavroidi për të dhënë shpjegime lidhur me deklaratën e fundit të ish shefit te diplomacisë, ndërsa kryediplomati turk tha se Greqia me anë të këtyre deklaratave shkakton tensione.
Ministria e jashtme greke reagoi duke thënë se zgjerimi i kufirit detar është e drejtë legjitime në përputhje me të drejtën ndërkombëtare, e se kërcënimet nuk kontribuojnë në marrëdhëniet e mira të fqinjësisë.
