Një sulm kamikaz ka përgjakur kryeqytetin afgan Kabul mëngjesin e kësaj të mërkure. Një autobombë shpërtheu në një zonë të rëndësishme, ku janë përqendruar ambasadat e huaja dhe ndërtesat qeveritare, duke shkaktuar të paktën 80 viktima dhe plagosur mbi 350 vetë.
Masakra ndodhi pranë ambasadës gjermane dhe shumica e personave që humbën jetën janë civilë. Shpërthimi ishte aq i fuqishëm saqë dëmtoi disa ambasada, dyqane, shkatërroi dhjetëra automjete dhe theu xhamat e ndërtesave qindra metra larg. Ambulancat mbërritën në vendngjarje dhe transportuan të plagosurit drejt spitaleve. Numri i viktimave mund të rritet sipas autoriteteve shëndetësore.
Asnjë grup nuk ka marrë ende përgjegjësinë për sulmin, por në të shkuarën të tilla ngjarje janë kryer nga talebanët, ose militantët e ISIS. Policia ende nuk e ka të qartë se kush ishte shënjestra e sulmit, që ndodhi pranë pallatit presidencial, ku siguria është shumë e lartë. Besohet se kamikazi ka shpërthyer një sasi të madhe eksplozivi në një autobot uji. Nuk dihet sesi automjeti ka depërtuar në një zonë, ku kontrollet janë të rrepta.
Presidenti afgan Ashraf Ghani dënoi me forcë sulmin që ndodh në muajin e shenjtë të Ramazanit, duke e cilësuar atë akt prej frikacakes.
Më shumë se një e treta e Afganistanit është jashtë kontrollit të qeverisë së Kabulit. Në këtë vend gjenden 8400 trupa amerikane dhe 5 mijë forca të NATO-s. Pentagoni ka kërkuar nga presidenti Trump të dërgojë mijëra forca të tjera për të mbështetur vendasit në betejën me talebanët dhe Shtetin Islamik.
