Këngëtari i njohur grek Giorgos Mazonakis ka ndërruar jetë në moshën 54-vjeçare.
Mazonakis u transportua me ambulancë në spitalin “Elpis” në Athinë. Shkaku i raportuar i vdekjes ishte arresti kardiak.
Lajmi për ndarjen e tij nga jeta vjen vetëm pak muaj pasi këngëtari kishte mbushur 54 vjeç. Giorgos Mazonakis ishte një nga emrat më të njohur të muzikës popullore dhe moderne greke, me një karrierë që shtrihej në më shumë se tri dekada.
Ai lindi më 4 mars 1972 në Nikea të Pireut dhe u rrit në të njëjtën zonë. Që në moshë të re tregoi interes për muzikën, duke u ndikuar nga kënga popullore greke dhe interpretues të njohur të saj.
Në adoleshencë vendosi ta ndiqte muzikën profesionalisht. Hapat e parë në skenë i hodhi në klubet e natës, ndërsa në fillim të viteve 1990 nisi të tërhiqte vëmendjen e industrisë diskografike greke.
Karriera e tij mori hov gjatë viteve ’90, duke e shndërruar gradualisht në një nga interpretuesit më të njohur të brezit të tij. Mazonakis u dallua për stilin e tij, i cili ndërthurte elemente të muzikës tradicionale popullore greke me tinguj bashkëkohorë.
Gjatë karrierës publikoi një numër të madh këngësh dhe albumesh, ndërsa performancat në skenat muzikore të Athinës dhe koncertet e shumta e mbajtën për dekada mes artistëve më të njohur të industrisë muzikore greke.
Ndarja e tij nga jeta në moshën 54-vjeçare shënon humbjen e një prej emrave të njohur të skenës muzikore greke.
