Në arredimin e një shtëpie, tendencat ndryshojnë vazhdimisht. Ngjyrat, materialet dhe format që sot mbushin revistat e dizajnit, nesër mund të duken të vjetruara. Por ka disa zgjedhje që i rezistojnë kohës dhe vazhdojnë të funksionojnë, edhe kur moda ndryshon.
Sipas dizajnerëve ndërkombëtar, vëmendja po zhvendoset gjithnjë e më shumë nga ambientet e ftohta dhe tepër minimaliste drejt shtëpive më të ngrohta, personale dhe me karakter. Në vend të një interieri perfekt, por anonim, po kërkohet një shtëpi që tregon historinë dhe shijen e njerëzve që jetojnë në të.
1. Ngjyrat e thella dhe të pasura
Për shumë vite, e bardha dhe tonet neutrale kanë dominuar arredimin e brendshëm. Sot, panorama po ndryshon.
Ngjyrat e thella si bordo, ulliri, okër, aubergine dhe tonet e duhanit po fitojnë gjithnjë e më shumë hapësirë. Një nga mënyrat më interesante për t’i përdorur është color drenching përdorimi i së njëjtës familje ngjyrash në mure, mobilie dhe elemente dekorative për të krijuar një ambient të unifikuar dhe intim.
Nuk është e nevojshme që e gjithë shtëpia të jetë shumëngjyrëshe. Një mur, një dhomë e vogël ose edhe një kolltuk në një nuancë të fortë mund të mjaftojë për t’i dhënë karakter hapësirës.
2. Luksi që jetohet çdo ditë
Luksi i vërtetë nuk lidhet domosdoshmërisht me mobiliet e shtrenjta apo me ambiente që duken sikur nuk duhet të preken.
Koncepti i “livable luxury”, ose luksit të jetueshëm, po bëhet gjithnjë e më i rëndësishëm. Bëhet fjalë për materiale cilësore, ndriçim të menduar mirë, tekstile rezistente dhe mobilie të bukura, por mbi të gjitha komode dhe funksionale.
Një shtëpi elegante është ajo ku mund të ulesh rehat, të presësh miq dhe të jetosh pa pasur frikë se do të prishësh diçka.
3. Druri i errët rikthehet në qendër të vëmendjes
Druri i arrës dhe mahoganit, si dhe tonalitetet e errëta të drurit po zëvendësojnë gradualisht përfundimet shumë të çelëta.
Druri i errët i jep një ambienti ngrohtësi, thellësi dhe një ndjesi më klasike. Ai funksionon veçanërisht bukur kur kombinohet me gur natyral, suva dekorative, tekstile të buta dhe ndriçim të ngrohtë.
Është një zgjedhje që nuk varet shumë nga trendet e momentit dhe mund të funksionojë po aq mirë në një interier klasik sa edhe në një hapësirë moderne.
4. Materialet natyrale nuk dalin nga moda
Nëse ekziston një parim që mund të konsiderohet vërtet timeless në arredim, ai është përdorimi i materialeve natyrale.
Druri, guri dhe bronzi jo vetëm që janë estetikisht të qëndrueshëm, por edhe ndryshojnë bukur me kalimin e viteve. Patina që krijohet në sipërfaqet natyrale mund t’i japë një materiali edhe më shumë karakter.
Në vend që të ndjekim çdo vit një material të ri, zgjedhja e materialeve cilësore dhe natyrale është një investim që mund të zgjasë shumë më gjatë.
5. Mobiliet vintage dhe objektet me histori
Një nga mënyrat më të mira për ta bërë një shtëpi të duket personale është të mos blini gjithçka të re.
Një pasqyrë antike, një kolltuk vintage, një tavolinë e trashëguar nga familja apo një objekt i gjetur gjatë një udhëtimi mund t’i japë ambientit një karakter që është e vështirë të krijohet me mobilie të prodhuara në masë.
Kombinimi i elementeve të vjetra me ato moderne krijon një ekuilibër interesant: shtëpia duket aktuale, por jo e lidhur me një periudhë të vetme.
6. Ngrohtësia mbi minimalizmin ekstrem
Minimalizmi nuk po zhduket, por versioni tepër steril i tij po humbet terren.
Ambientet me shumë hapësirë boshe, mure krejtësisht të bardha dhe mungesë të elementeve personale po zëvendësohen nga interiere më të ngrohta dhe të jetuara. Mobiliet me forma të buta, qilimat, druri, tekstilet dhe objektet dekorative ndihmojnë në krijimin e kësaj ndjesie.
Qëllimi nuk është të mbushim çdo cep, por të krijojmë një hapësirë ku ndihemi mirë.
7. Letra e murit dhe perdet bëhen sërish protagoniste
Wallpaper-i po përjeton një rikthim të fortë. Modelet botanike, teksturat dhe dizajnet më dekorative po përdoren për t’i dhënë mureve më shumë personalitet. Edhe perdet dekorative po rikthehen si një element i rëndësishëm i arredimit.
Në vend që të trajtohen thjesht si elemente funksionale, muret dhe dritaret po përdoren për të krijuar atmosferë.
8. “Slow design”: më pak, por më mirë
Një tjetër koncept që po fiton rëndësi është slow design – një mënyrë më e menduar dhe më e qëndrueshme për të arreduar shtëpinë.
Në vend që një ambient të kompletohet menjëherë me produkte të prodhuara në masë, ideja është që mobiliet dhe objektet të zgjidhen gradualisht, duke kërkuar cilësi, mjeshtëri dhe histori.
Kjo qasje e bën shtëpinë më personale dhe, njëkohësisht, ndihmon në shmangien e blerjeve impulsive që mund të dalin shpejt nga moda.
9. Natyra brenda shtëpisë
Bimët, materialet natyrale dhe lidhja me ambientin e jashtëm vazhdojnë të jenë një element i rëndësishëm në dizajnin modern.
Koncepti i biophilic design shkon përtej vendosjes së disa bimëve në sallon. Ai përfshin përdorimin e materialeve natyrale, dritës së mirë, pamjeve drejt natyrës dhe krijimin e një lidhjeje më të fortë mes ambienteve të brendshme dhe jashtë.
Rezultati është një shtëpi që nuk është vetëm e bukur, por edhe më e qetë dhe më mikpritëse.
/vizionplus.tv
