Kreu i Lidhjes Demokratike të Kosovës, Lumir Abdixhiku bëri të ditur se është detyruar që të ndërpresë bisedimet me Vetëvendosjen për formimin e institucioneve të reja, për shkak të zhvillimeve brenda partisë.
Përmes një video të publikuar në rrjetet sociale, Abdixhiku tha se ka autorizuar sekretariatin e partisë që të nisë procedurat për mbajtjen e një kuvendi të jashtëzakonshëm partiak.
Kjo thirrje erdhi pasi 148 delegatë të Kuvendit të LDK-së dorëzuan firmat me kërkesën për shkarkimin e kreut të partisë.
“Për shkak të kësaj nisme, detyrohem t’i ndërpres të gjitha angazhimet për formimin e institucioneve të Republikës që i prisni me të drejtë tash e sa kohë”, tha Abdixhiku.
Sipas tij, nuk do të ishte serioze e as e përgjegjshme që ai të vazhdojë të negociojë në emër të LDK-së.
“Ndjej keqardhje që sot jam i detyruar ta kthejmë vëmendjen sërish nga vetja tek një proces që mund të na dëmtojë pariparueshëm nga brenda dhe ta lërë Kosovën pa institucione dhe potencialisht përballë zgjedhjeve të reja në vjeshtë”, tha ai.
Kërkesa për shkarkim vjen pas përplasjeve të hapura brenda LDK-së dhe pakënaqësive ndaj Abdixhikut, pasi partia doli e treta në zgjedhjet parlamentare të qershorit, duke fituar vetëm 18 vende në Kuvend.
