Në kuadër të Samitit të NATO-s 2026, në Ankara të Turqisë po zhvillohet sot Forumi i Industrisë së Mbrojtjes, një nga aktivitetet kryesore të këtij takimi, i cili ka mbledhur zyrtarë të lartë të Aleancës, përfaqësues të vendeve anëtare dhe partnere, drejtues të industrisë së mbrojtjes dhe ekspertë të inovacionit teknologjik.
Sipas NATO-s, ky forum përbën një nga aktivitetet më të rëndësishme të nivelit të lartë kushtuar prodhimit, investimeve dhe zhvillimit të kapaciteteve mbrojtëse në hapësirën transatlantike.
Në fokus të diskutimeve është zbatimi i planit të NATO-s për rritjen e investimeve në mbrojtje deri në nivelin 5% të Prodhimit të Brendshëm Bruto, si dhe mënyrat se si këto investime do të shndërrohen në kapacitete më të avancuara ushtarake, bashkëpunim më të ngushtë mes aleatëve dhe projekte të përbashkëta të prokurimit.
Forumi njëditor nis me gjashtë sesione të mbyllura gjatë paradites, ndërsa pasditja do të vijojë me seanca plenare të transmetuara drejtpërdrejt. Gjatë aktivitetit priten gjithashtu njoftime për marrëveshje, iniciativa të reja dhe rezultate konkrete nga shtetet anëtare, industria e mbrojtjes dhe partneritetet shumëpalëshe.
Diskutimet do të përqendrohen në fusha kyçe si mbrojtja ajrore dhe raketore, kapacitetet goditëse, hapësira dhe sistemet e mbikëqyrjes, bashkëprodhimi transatlantik, inovacioni teknologjik dhe forcimi i bashkëpunimit mes NATO-s dhe industrisë së mbrojtjes.
Samiti i NATO-s në Ankara konsiderohet një nga takimet më të rëndësishme të Aleancës në vitet e fundit, me synimin për të përcaktuar drejtimet e reja të bashkëpunimit dhe investimeve në sigurinë kolektive për vitet e ardhshme.
/vizionplus.tv
