Nga 1 korriku nisi indeksimi i pensioneve për të gjithë pensionistët. Masa e indeksimit është 2.7 %.
Kjo masë është 0.2% më e lartë se një vit më parë, pasi është reflektues i rritjes së inflacionit për shkak të krizës në Lindjen e Mesme. Por këtë herë indeksimi nis tre muaj më herët nga parashikimi fillestar që ishte muaji tetor.
“Qeveria vlerësoi se ishin kushtet e duhura ekonomike që indeksimi të nistë më herë, pasi kurset në llogarinë e Bankës së Shqipërisë mundësonin këtë vendim. Paralelisht edhe performanca ekonomike ishte një arsye për t’i ofruar pensionistëve mundësinë që të ruajnë fuqinë blerëse”, tha Endrit Yzeiraj gjatë një interviste për emisionin e-ZONE.
Konkretisht me këtë normë indeksimi shtesa në pensionet mesatare rurale dhe ato urbane arrin nga 320-543 lekë.
Paralelisht me indeksimin qeveria për herë të parë vendosi edhe një bonus për pensionistët në masën 5 mijë lekë. Përfitues janë mbi 700 mijë pensionistë
“Ky bonus reflekton qasjen e qeverisë drejt shtresave në nevojë, aq më tepër kur inflacioni ka shënuar një rritje dhe kostot e jetesës janë shtrenjtuar. Qeveria ka qenë konsistente kur ka thënë se çdo performancë e mirë ekonomike do t’i kthehet qytetarit. Ndaj ky bonus është reflektim i performancës ekonomike”, tha Yzeiraj.
Por për ekspertin Eduard Gjokutaj nga qëndra Altax këto vendime janë injektime, që ofrojnë ndihëm të përkohshme dhe nuk ofrojnë zgjedhje afatgjatë.
“Qeveria nisi vitin me vendimin për të rritur pensionet, një rritje që u shtri në të gjithë muajt e vitit. Skema e pensioneve mbetet ende problematike dhe ka nevojë për një reformë të thellë në mënyrë që pensionistëve t’i ofrojnë zgjidhje afatgjatë dhe jo bonuse, që janë të varur nga ecuria ekonomike. Politika e bonuseve është më shumë një politikë elektorale, që qeveria përdorë në mënyrë të vazhdueshme”, tha Gjokutaj
Indeksimi dhe bonunsi po shpërndahen nga data 1 korrik në sportelet e postës për të gjithë përfituesit.
/vizionplus.tv
