Ashtu siç është paralajmëruar, në orën 10:00 qytetarët do të mblidhen për protestën e radhës përpara Parlamentit. Kjo është ndalesa e dytë, pas asaj të ditës së martë, që qytetarët rrethojnë Kuvendin.
Protestuesit e parë kanë mbërritur, të cilët kanë hedhur miell në drejtim të makinës së kryetarit të Kuvendit Niko Peleshi.
Për të shmangur përplasjet, policia ka marrë një sërë masash. I gjithë perimetri i Kuvendit është rrethuar me barriera metalike, ndërsa janë bërë edhe shoqërimet e para.
5 persona janë shoqëruar për në komisariat.
Tensionet para Parlamentit nuk janë drejtuar vetëm ndaj mazhorancës, por kanë përfshirë edhe përfaqësuesit e opozitës. Në një moment tjetër të tubimit, në ambientet jashtë Kuvendit kanë mbërritur disa deputetë të Partisë Demokratike.
Sapo janë parë nga turma, protestuesit e irrituar kanë shpërthyer në thirrje dhe koret e tyre kanë marrë një tjetër kah.
“Opozitë e shitur!”, kanë qenë thirrjet që kanë jehuar në drejtim të deputetëve demokratikë, duke dëshmuar se revolta qytetare tashmë është e pozicionuar kundër të gjithë klasës politike tradicionale. “Nuk na përfaqësoni” dhe “Rama burg, Berisha burg”, ishin thirrjet që përcollën deputetët teksa hynin në Parlament.
