Psikologu klinik Skerdi Zahaj, i ftuar në emisionin QUO VADIS në Vizion Plus foli për ndryshimet mes mënyrës së prindërimit në vitet ’90 dhe atyre të ditëve të sotme.
Ai theksoi se sfidat me të cilat përballen familjet kanë ndryshuar ndjeshëm.
Sipas Zahajt, prindërit e brezit të kaluar ishin më autoritarë dhe të fokusuar te disiplinimi, edukimi dhe plotësimi i nevojave bazë të fëmijëve, ndërsa sot sfidat lidhen me ndikimin e teknologjisë, rrjeteve sociale dhe mungesën e kohës.
Psikologu vuri në dukje se një nga problemet më të mëdha të prindërve të sotëm është mungesa e kohës për të kaluar me fëmijët.
Pjesë nga biseda:
Borakaj: Çfarë diference ka nga ne tek prindërit tanë?
Zahaj: Kryesisht prindërit tanë kanë pasur sfida të tjera nga sfidat që ne kemi. Dhe prindërit tanë kanë qenë më stil autoritar, më të drejtuar drejt disiplinimit, kërkesave, plotësimit të nevojave bazë që ne kemi pasur nevojën për ushqim, për shkollim. Aktualisht, fatmirësisht brezi jonë është shumë i zhvilluar edhe këto nevoja bazë janë plotësuar, por ne kemi sfida të tjera. Në vitet ’90 unë dhe ti krahasoheshim me kushërinjtë, me lagjen, ndërsa fëmijët tanë sot krahasohen me të gjithë botën. Ata mund të shikojnë se çfarë ndodh në çdo cep të botës. Edhe kjo ndikon shumë në zhvillimin e tyre të identitetit, në faktin vetëvlerësimin, në gjërat e ankthit që ata mund të ndjejnë. Ekspozimi, informacioni është shumë i madh që ne kemi, por brezi jonë i prindërve e ka shumë të vështirë të gjejë kohë. Koha për të kaluar me fëmijët është përherë më e pakët. Dhe për shembull një nga faktet që mua më habit është që unë e mbaj mend që kur unë isha fëmijë ne drekën e hanim gjithmonë me prindërit. Aktualisht unë nuk mund ta ha drekën dot me fëmijët e mi.
/vizionplus.tv
