Një operacion i gjerë antidrogë i zhvilluar nga autoritetet turke në Stamboll ka çuar në ndalimin e 22 personave, mes tyre disa figura të njohura të botës së artit, televizionit dhe rrjeteve sociale.
Aksioni u krye mëngjesin e së enjtes në kuadër të një hetimi të drejtuar nga Istanbul Chief Public Prosecutor’s Office për vepra të dyshuara që lidhen me narkotikët. Forcat e policisë realizuan kontrolle të njëkohshme në disa adresa në të gjithë qytetin, duke vënë në pranga 22 të dyshuar.
Mes të ndaluarve janë këngëtari Kenan Doğulu, aktorja Beren Saat, influencuesi Kerimcan Durmaz, këngëtarja dhe modelja Ayşe Hatun Önal, muzikanti Ozan Doğulu, këngëtari Berdan Mardini, aktori Enis Arıkan dhe influencuesja Selin Ciğerci.
Aktorja Beren Saat, është e njohur për publikun shqiptar nga rolet e saj në serialet e famshme turke.
Në listën e të ndaluarve përfshihen gjithashtu Tolga Çam, Ferhan Kaya, Murat Saygı, Enis Ahmet Onat, Ahmet Karoğlu, Emre Tari, Hasan Vatan, Mehmet Cem Karcı, Reyhan Küçükyeğen, Yaşar İpek, Mehmet Yıldız, Tessy Ramos Correira, Rafet Eren Yorulmazer dhe Ali Efe Bezci.
Deri më tani, autoritetet nuk kanë bërë publike detaje mbi rolin apo akuzat konkrete ndaj secilit prej të ndaluarve. Procedurat në komisariat vijojnë, ndërsa Prokuroria e Stambollit ka njoftuar se hetimet janë ende aktive dhe se veprimet në kuadër të këtij operacioni po vazhdojnë.
/vizionplus.tv
