Kryetari i Kuvendit, Niko Peleshi, zhvilloi një vizitë zyrtare në Madrid, me ftesë të Kryetares së Kongresit të Deputetëve të Spanjës, Francina Armengol, në kuadër të diplomacisë parlamentare për mbështetjen e procesit të anëtarësimit të Shqipërisë në Bashkimin Europian.
Në takimet me Kryeparlamentaren Armengol dhe Zëvendëskryetarin e Parë të Senatit, Javier Maroto Aranzabal, u riafirmua mbështetja e fuqishme e Spanjës për integrimin europian të Shqipërisë. Armengol vlerësoi progresin e dukshëm dhe vendosmërinë e palëkundur të vendit tonë në rrugën drejt BE-së dhe rikonfirmoi mbështetjen e fuqishme të Spanjës. Spanja dhe Shqipëria janë miq ekselent dhe bota e sotme e kërkon Shqipërinë anëtare të BE. Prandaj na llogarisni në krahun e Shqipërisë, do ju mbështesim politikisht dhe teknikisht. Ne vlerësojmë mbështetjen popullore dhe konsensusin politik e parlamentar për anëtarësimin në BE.
Ndërsa Aranzabal theksoi se Bashkimi Europian bëhet më i fortë me vende si Shqipëria, me orientim të qartë europian dhe vlera demokratike.
Vizita u zhvillua në një moment të rëndësishëm për procesin integrues, në ditën e mbajtjes së Konferencës Ndërqeveritare Shqipëri-BE dhe pas miratimit të Raportit IBAR nga vendet anëtare të Bashkimit Europian. Kryetari Peleshi shprehu mirënjohjen për mbështetjen konstante të Spanjës, duke theksuar se ajo mbështetet mbi arritjet konkrete të Shqipërisë dhe vlerat e përbashkëta demokratike.
Delegacioni shqiptar mori pjesë dhe u përshëndet në seancat plenare të Kongresit të Deputetëve dhe Senatit spanjoll.
Gjatë takimeve u diskutua zgjerimi i bashkëpunimit parlamentar dhe shkëmbimi i përvojave në funksion të procesit të integrimit europian, harmonizimit të legjislacionit me standardet e BE-së, si edhe forcimi i bashkëpunimit teknik ndërmjet dy parlamenteve.
Palët vlerësuan marrëdhëniet shumë të mira politike mes Shqipërisë dhe Spanjës dhe theksuan nevojën për thellimin e bashkëpunimit ekonomik, tregtar, në investime, arsim të lartë, kulturë, turizëm të qëndrueshëm, mbrojtjen e mjedisit dhe të klimës.
Vizita përkon me 40-vjetorin e rivendosjes së marrëdhënieve diplomatike mes dy vendeve dhe shënon vizitën e parë të një kryeparlamentari shqiptar në Spanjë pas afro dy dekadash.
Në fokus të bisedimeve ishte edhe bashkëpunimi si vende partnere në NATO, për garantimin e sigurisë, mbështetjen për Ukrainën, paqen në Lindjen e Mesme, qëndrimin ndaj Iranit, stabilitetin në Ballkanin Perëndimor dhe normalizimin e marrëdhënieve mes Kosovës dhe Serbisë.
Kryetari i Kuvendit, Niko Peleshi shoqërohet në këtë vizitë zyrtare në Madrid nga delegacioni i Kuvendit të Shqipërisë, i përbërë nga deputetet Romina Kuko, Jorida Tabaku, Besa Spaho, si edhe Ambasadorja e Shqipërisë në Spanjë, Entela Gjika.
