Izraeli po shqyrton mbylljen e konsullatës së tij në Stamboll, një nga të parat që ka themeluar në botë dhe e cila ka qenë në funksion që nga viti 1949.
Sipas raportimeve, asnjë diplomat izraelit nuk ndodhet aktualisht në tokën turke dhe ambasadat e Izraelit në rajonin e gjerë u evakuuan, jo vetëm në Turqi, por edhe në vende të tjera, për arsye sigurie pas 7 tetorit 2023.
Që nga fillimi i luftës në Gaza, Presidenti turk Rexhep Tajip Erdogan ka shtuar deklaratat e tij agresive ndaj Izraelit dhe Kryeministrit Netanyahu, të cilin e quan “nazist” dhe “gjenocidal”. Komuniteti hebraik i Turqisë tani numëron rreth 15,000, ndërsa në vitet 1950, ishte rreth 55,000. Turqia ishte vendi i parë mysliman që njohu shtetin e Izraelit, në vitin 1949.
Të dy vendet rivendosën marrëdhëniet diplomatike në vitin 2016, pas një përçarjeje gjashtëvjeçare për shkak të sulmit vdekjeprurës izraelit ndaj anijes turke Mavi Marmara, e cila ishte pjesë e një flotiljeje të Gazës.
