Ministri i Drejtësisë, Toni Gogu, në një konferencë për mediat ka deklaruar se reforma në drejtësi në Shqipëri po shënon progres të dukshëm, si në aspektin institucional ashtu edhe në perceptimin e qytetarëve.
Ministri Gogu u shpreh se në 18 muajt e fundit janë angazhuar 70 institucione dhe janë përgatitur mbi 8 mijë faqe dokumentacion në kuadër të procesit IBAR, i cili sipas tij tashmë ka kaluar në nivelin e grupit të ambasadorëve të vendeve anëtare.
“Në 18 muajt e fundit 70 institucione që janë koordinuar, janë dërguar mbi tetë mijë faqe dokumentacion. IBAR është një proces që tashmë ka kaluar nga grupi i punës në grupin e ambasadorëve të vendeve anëtare dhe tregon që procesi lëviz, dhe ka mbështetje faktike dhe institucionale të çdo mase nga ana jonë. Besoj në fund të ditës ky raport që ka vlerësuara masat tona ka të bëjë me rezultate që ne duam të shohim në vijim nga sistemi i drejtësisë”, u shpreh ministri.
Ai theksoi gjithashtu se cilësia e reformave po vlerësohet në raportet ndërkombëtare, ndërsa prezantoi edhe një anketë rajonale mbi sistemin e drejtësisë.
“Cilësia e reformave vlerësohet në atë raport. Në lidhje me sistemin e drejtësisë dhe backlog, dje prezantuam një anketë rajonale ku del qartë progresi i reformës në drejtësi në Shqipëri. Besimi i qytetarëve është dyfishuar, në 53%, pavarësia e sistemit është rritur me 30%, vetë reforma perceptohet pozitivisht, perceptimi negativ ka zbritur. Shifra negative është ajo që ka të bëjë me backlog sepse qytetarët e shohin sistemin të vështirë për ta përballuar financiarisht. Po shohim shenjat e para pozitive të kthimit të prirjeve në sistem, të çështjeve të mbartura”, deklaroi ai.
Gogu bëri të ditur gjithashtu se ka nisur puna për ndërtimin e godinës së re të Gjykatës së Apelit, si dhe për shtimin e kapaciteteve njerëzore në gjykata.
“Kemi harmonizuar statistikat, numrat do t’i lexojmë njësoj. Rriten kapacitete njerëzore në Gjykata, numri i këshilltarëve ligjor po rritet në të gjitha nivelet e gjykatave, hapësirat janë shtuar, presim që të ecë para ndërtimi i godinës së re për Gjykatën e Apelit”, tha ai. E ndërkohë shtoi se një “masë tjetër që ministria po konsideron, është nxitja e zgjidhjeve jashtëgjyqësore, siç është ndërmjetësimi”.
Ai shtoi se një tjetër masë që po shqyrtohet nga ministria është nxitja e zgjidhjeve jashtëgjyqësore, përmes mekanizmave të ndërmjetësimit.
