Banorët e një pallati në Bronx po jetojnë prej javësh në frikë dhe panik për shkak të sjelljes së dhunshme dhe shqetësuese të një prej fqinjëve të tyre, i cili akuzohet se terrorizon vazhdimisht banorët e ndërtesës. Sipas mediave amerikane, bëhet fjalë për 28-vjeçarin Anthony Orosco, i cili është filmuar duke lëvizur në korridoret e pallatit me veshje femrash dhe duke mbajtur sende të rrezikshme në duar.
Pamjet që kanë qarkulluar në rrjet tregojnë të riun duke goditur dyert e fqinjëve me sëpatë dhe duke bërtitur në mënyrë kërcënuese. Në video të tjera, ai shihet duke lëvizur në korridore pa pantallona dhe këpucë, ndërsa banorët pretendojnë se është kapur edhe duke kryer veprime të turpshme në ambientet e përbashkëta të pallatit.
Banorët thonë se ndihen të pasigurt dhe kanë frikë të dalin nga apartamentet e tyre. “Ndonjëherë kemi frikë të ecim në korridore. Ai godet dyert e njerëzve dhe sillet në mënyrë agresive”, u shpreh një prej banoreve për mediat lokale.
Situata u përshkallëzua më 4 prill, kur 28-vjeçari dyshohet se hapi të gjitha vatrat e gazit në apartamentin e tij pa i ndezur, duke shkaktuar rrjedhje gazi në të gjithë ndërtesën. Shërbimet zjarrfikëse ndërhynë menjëherë dhe ndërprenë furnizimin me gaz, por sipas banorëve, ai e riktheu sërish, ndërkohë që lëvizte nëpër pallat duke pirë cigare, çka ngriti frikën për një shpërthim të mundshëm.
Autoritetet bëjnë me dije se Anthony Orosco nuk ka paguar qiranë prej janarit 2025 dhe ndaj tij është hapur procedurë dëbimi nga banesa, por procesi gjyqësor ende nuk ka përfunduar. Ndërkohë, ai është akuzuar edhe për dëmtim të kamerave të sigurisë dhe për kërcënim të një gruaje me shufër metalike jashtë apartamentit të saj.
Pavarësisht incidenteve të shumta dhe arrestimit nga policia, 28-vjeçari vazhdon të jetë i lirë me kusht, gjë që ka shtuar zemërimin dhe frikën e komunitetit. Banorët kërkojnë ndërhyrje të menjëhershme nga autoritetet për të garantuar sigurinë në pallat dhe për të shmangur incidente më të rënda në të ardhmen.
/vizionplus.tv
