Policia e Shtetit ka ndaluar në Aeroportin e Rinasit një shtetas turk të shpallur në kërkim ndërkombëtar për vepra të rënda penale.
Në pranga ka rënë Ibrahim Karaoglu, 67 vjeç, i cili u ndalua nga Njësia Rajonale Antiterrorizëm Tiranë gjatë tentativës për të hyrë në Shqipëri, nëpërmjet Pikës së Kalimit Kufitar Rinas.
Sipas njoftimit zyrtar, ndalimi i tij u bë si rezultat i bashkëpunimit mes strukturave të Antiterrorit në Policinë e Shtetit dhe partnerëve turq, si dhe falë kontrolleve të shtuara në hyrje-dalje nga shërbimet e Policisë Kufitare.
Karaoglu ishte shpallur në kërkim ndërkombëtar për veprat penale “tentativa për rrëzimin e rendit kushtetues” dhe “anëtarësimi në organizatë të armatosur terroriste”, sipas legjislacionit penal turk.
Ndalimi i tij u krye në zbatim të një urdhri të prokurorit, të bazuar në një vendim të mëparshëm të Gjykatës së Rrethit Gjyqësor Tiranë, për caktimin e masës së sigurisë “arrest në burg”, me qëllim ekstradimin e tij drejt Turqisë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për vijimin e procedurave ligjore në funksion të ekstradimit.
