Çmimet e larta të naftës do të shkaktojnë një krizë të re çmimesh në Shqipëri, sipas guvernatorit Gent Sejko.
Gjatë takimeve në Uashington me përfaqësues të Fondit Monetar Ndërkombëtar dhe Bankës Botërore, Sejko deklaroi se Banka e Shqipërisë do të ndërhyjë me mekanizmin e politikës monetare, për të rikthyer inflacionin në objektiv.
“Reagimi i politikës sonë monetare do të jetë i bazuar në të dhëna, i kalibruar me kujdes dhe duke pasur si objektiv të palëkundur ruajtjen e stabilitetit të çmimeve”, tha Sejko.
Nga ana tjetër, përfaqësuesit e FMN nënvizuan se përshkallëzimi i konflikteve po shkakton kosto të rëndë duke ndikuar veçanërisht shtresat më të varfra. Ky grup, sipas FMN, duhet të mbështetet gjatë këtyre periudhave.
“Masat mbështetëse në fushën e energjisë duhet të kenë objektiv të qartë, të jenë të përkohshme dhe të koordinuara, për të mbrojtur në veçanti shtresat më të brishta”, tha FMN.
