Këtë të enjte çmimi i naftës në tregun vendas është rritur sërish. Në pikat e karburanteve në kryeqytet një litër naftë po tregtohet deri në 214 lekë, ku në disa pika të një cilësie më të mirë ka shkuar deri në 217 lekë, duke pësuar një rritje me afro 14 lekë nga çmimi i dy ditëve më parë.
Kjo rritje vjen vetëm një ditë pasi kryeministri Edi Rama zhvilloi një takim me tregtuesit e naftës, ku u shpreh se nuk ka nevojë për rikthimin e Bordit të Transparencës.
Sipas tij, rritjet e deritanishme kanë qenë të moderuara dhe brenda pritshmërive të tregut, duke mos justifikuar ndërhyrje të drejtpërdrejtë nga qeveria në këtë moment.
Pavarësisht kësaj, shtrenjtimi i çmimit të naftës duket se po e shtyn ekonominë vendase drejt një krize të re, të ngjashme me atë të vitit 2022, kur nisi lufta në Ukrainë. Nafta është lëndë e parë dhe rritja e saj shkakton efekt zinxhir edhe në shtrenjtimin e shumë produkteve dhe shërbimeve, duke shtuar kostot e jetesës për familjet shqiptare dhe duke rikthyer rritjen e inflacionit.
Pak ditë më parë, Shoqata e Transportit Qytetas dhe Ndërqytetas kërkoi kompensim nga qeveria për rritjen e çmimit të naftës brenda një periudhe të shkurtër, në të kundërt operatorët do të reduktojnë numrin e autobusëve në lëvizje.
Zhvillimet në tregun vendas lidhen ngushtë edhe me luhatjet në tregjet ndërkombëtare. Në bursat globale, çmimi i naftës vijon të mbetet i paqëndrueshëm, i ndikuar nga faktorë gjeopolitikë dhe ekonomikë, duke u reflektuar në mënyrë të drejtpërdrejtë edhe në çmimet me pakicë në vend./vizionplus.tv
